إبراهيم عادل يكشف تفاصيل مكالمة الأهلي لضمه وموقفه من اللعب في الدوري الإماراتي

كشف إبراهيم عادل جناح الفريق الكروي الأول بنادي نورشيلاند الدنماركي والمعار من نادي الجزيرة الإماراتي، عن تفاصيل تواصل الأهلي وبيراميدز لضمه خلال الفترة الأخيرة، وحلم الاحتراف الأوروبي.

وقال إبراهيم عادل في تصريحات عبر قناة "أون سبورت": "في الإمارات الناس محترمة وكانت خطوة كويسة الانضمام للجزيرة، قد يعتقد البعض أنها ليست جيدة، ولكن بالعكس تماما، في يناير أنا مكنتش عايز اكمل عادي، وكنت حاسس إني عايز أطلع أوروبا، ومش عاوز ألعب في الإمارات".

وتابع: "كان نفسي أطلع، وفي يناير سهلولي الموضوع، ومكنش عندي عروض في أوروبا، العروض كانت في أول الموسم، وبيراميدز كلموني والأهلي كلموني، وكلمني الأهلي بعد بيراميدز لما حسوا إن الجنيا مفتوحة".

وأكمل: "كنت مخلص كل حاجة مع بيراميدز، مع عمرو بسيوني وهو صديقي بره الملعب، وبحبه جدا وبتمنى ليه كل التوفيق".

وذكر: "بصراحة حسيت إني مش عايز أرجع، وكنت عايز أقول بعد كل ده هسيب كل حاجة وأرجع، وده مش هدفي وليه أصلا طلعت من الأول، لذلك حاربت على الذهاب في أوروبا".

واستكمل: "الأهلي دخل وأنا بخلص في نادي في الدنمارك، وكلمني محمد النني ومكنتش برد على التليفون، وتقريبا كان فيه حد كلمه من الأهلي تقريبا سيد عبد الحفيظ كان عايز يكلمني، وأي حد هيكون عايز يلعب في الأهلي، ولكن كان عندي هدف اللعب في أوروبا، وقولت للنني أنا بخلص في أوروبا، والنادي ده كان عايزين من فترة حوالي 3 أو 4 سنوات قبل كده".

واسترسل: "حسام الزناتي كلمته قبل كده وكان شغال في لوجانو في سويسرا، عندما كنت في بيراميدز قبل ما أروح الجزيرة، وقدملي عرض وتم رفضه، مكنش فيه خيار غير الجزيرة".

وقال: "حسام الزناتي كلمني وإسلام وكيلي قالي إن حسام بيتواصل معاه، وقالي هو مش في لوجانو دلوقتي، هو موجود في نورشيلاند، وقولت له إنه من 4 سنين كانوا بيكلوني وقالي إن الناس عايزينك، وأنا انبسطت خاصة إنه نادي كبير وبيطلع لاعيبه بره في دوريات قوية".

وأردف: "قعدت مع وكلائي واتكلمنا في كل حاجة، وقالولي لا ترجع مصر، رغم منحهم لي حرية الاختيار، وأنا قولت لهم إني عايز أطلع وصليت استخارة، وبعد ما خلصت كلمت عمرو بسيوني وقولتله أنا عايز أطلع أوروبا رغم إني خلصت كل حاجة مع بيراميدز، وقولتله إني عايز أوصل لحته بعيده وقالي إن بابنا مفتوح لو حبيت ترجع مصر".

وتابع:"النني تواصل معي في الفترة الأخيرة من مرحلة تعاقدي مع نورشيلاند، وقولت له سلملي على الكابتن سيد وكان عايز يعمل معايا مكالمة فقولت له مش عايز أتكلم في حاجة ممكن متحصلش دلوقتي، وقولت له أشكره وشرف كبير اللعب للأهلي بس أنا عايز أخد خطوة الاحتراف".

وأتم: "أنا باخد فلوس في نورشيلاند أقل بكتير جدا من اللي باخدها في بيراميدز والجزيرة، أقل بكتير جدا، ولم أتحدث مع الأهلي في أي شئ أو أي أمور مادية".

وأضاف: "أنا مكنتش عايز أروح أصلا الإمارات في الأول، واتقالي في بيراميدز هتقعد باقيلك 3 سنين، لا هتكمل في النادي لا هتروح الجزيرة، كنت باخد عقد قليل جدًا جدًا في بيراميدز، فيه لاعيبه مكنتش بتلعب بتاخد أ{قام أكتر مني، بس أنا كنت راضي وكانوا بيكفوني والكل كان مرضي الحمد لله، وكنت مبسوط جدا جدا".

واختتم: "عرض لوجانو كان برقم كبير جدًا بـ 3 مليون دولار، والعرض اتبعتلي وأنا بعته لبيراميدز، ومعرفش الرقم اللي اتباعت بيه للجزيرة، ومعرفش تمت ازاي، وانضممت للجزيرة رغبة في الانتقال لـ أوروبا من هناك، واتفقت معاهم قبل التوقيع إن في حال وجود أي عرض أوروبي همشي لأني جاي هنا مرحلة تخليني أحترف في أوروبا".